جوايه ايه
جوايه شوارع جوايه مدينه
لما بحب اخرج بروح جوايه واتمشى
على شط قلبي بقعد واسرح
جوه شوارعى بذكرياتى بتفسح
فى الشارع على يمينى وشمالى ناس كتيره
ناس بتضحك وفرحانه
وناس والله ماعرف منى زعلانه
ولا عليه بتبكى وحيرانه
مش عارف ليه البيوت جوايه مايله
والعيون كتيره وتايهه
والشوارع من دمع العين غرقانه
والدنيا جوايه عتمه وكتمه
ايه اللى حصلك يامدينتى
ايه اللى جرالك ياحلم عمري
مين دخل ورايه جواكى
مين عمل كده ودمر فيكى
وايه يعنى بقالى سنين مابصيت عليكى
مش ذنبى ده كان غصب عنى
ده كان فيه حاجه بره بعدانى عنكى
بس خلاص ارتاحى يامدينتى
انا اهه رجعتلك من تانى
انور القناديل فيكى
وامسح الشوارع من الدموع
ونور الامل هايكون بدل نور الشموع
افرحى ده انا رجعتلك يامدينتى
هانسمع زقزقة العصافير من تانى
ومافيش غير الحان الامانى
نغنيها نعيش ونسرح وياها
ماهو اللى كان عنك بعدنى راح
خلاص وانتهى منى
عاوز ركن جديد هابنيه فيكى
قصر صغير تعيش فيه ذكرياتى
عاوز كل المدينه تزوره من وقت للتانى
هخصص وقت كل يوم اجدد فيه احزانى
وهابنى قصر تانى كبير للامانى
كل المدينه تيجى برضه تزوره واحلى حاجه تتمنالى
كل يوم هايكون فيه ضحكه وفرحه
كل يوم هايكون فيه ذكرى ودمعه
بس المهم انى اكون جوايه
معاكى يا مدينتى مش هفارقك تانى
وان قابلنى حد بره هقول مش هعيش غير فى مدينتى
جوايه جوه الشوارع المليانه
ناس بتضحك وناس زعلانه
واللى يرضى عنه شعب مدينتى
هو ده اللى يستاهل يكون امير مدينتى
واكتبله يافطه على باب المدينه
بدم قلبي اسطرها
نورت يا اميري نورت مدينتى
ليست هناك تعليقات:
إرسال تعليق